નાનાપોઢા તાલુકા પંચાયત ખાતે પ્રમુખ અને ઉપપ્રમુખ પદની ચૂંટણી માટે ઉમેદવારી પત્ર ભરવાની પ્રક્રિયા ઉત્સાહભેર અને શાંતિપૂર્ણ માહોલમાં પૂર્ણ થઈ હતી. તાલુકા પંચાયત કચેરી ખાતે મોટી સંખ્યામાં ભાજપના આગેવાનો, તાલુકા પંચાયતના સભ્યો તથા કાર્યકરોની ઉપસ્થિતિ વચ્ચે ઉમેદવારી પ્રક્રિયા હાથ ધરાઈ હતી.
પ્રમુખ પદ માટે અનુસૂચિત જનજાતિ અનામત બેઠક પર મનીષાબેન વિજયભાઈ પટેલે ઉમેદવારી નોંધાવી હતી. તેમની ઉમેદવારી દરખાસ્ત હિતેશભાઈ પટેલ દ્વારા રજૂ કરવામાં આવી હતી. બીજી તરફ ઉપપ્રમુખ પદ માટે તુષારભાઈ અમરતભાઈ પટેલે ઉમેદવારી નોંધાવી હતી અને તેમની દરખાસ્ત મહેશભાઈ છોટુભાઈ પટેલ દ્વારા મૂકવામાં આવી હતી. બંને ઉમેદવારોના સમર્થનમાં કાર્યકરોમાં ખાસ્સો ઉત્સાહ જોવા મળ્યો હતો.
તાલુકા વિકાસ અધિકારી સમક્ષ ઉમેદવારી પત્રો રજૂ કરવામાં આવ્યા હતા. ચૂંટણી પ્રક્રિયા દરમિયાન પંચાયત અધિનિયમ તથા ચૂંટણી નિયમો અનુસાર જરૂરી દસ્તાવેજો, પ્રમાણપત્રો અને અન્ય પ્રક્રિયાત્મક બાબતોની ચકાસણી પણ કરવામાં આવી હતી. અધિકારીઓ દ્વારા સંપૂર્ણ પારદર્શિતા અને નિયમબદ્ધ રીતે કાર્યવાહી હાથ ધરાતા સમગ્ર પ્રક્રિયા વિવાદરહિત અને સુવ્યવસ્થિત રહી હતી.
ઉમેદવારી પ્રક્રિયા પૂર્ણ થતાં તાલુકા પંચાયતના ચૂંટાયેલા સભ્યો તથા કાર્યકરોમાં ખુશીનો માહોલ જોવા મળ્યો હતો. કાર્યકરો દ્વારા ઉમેદવારોને શુભેચ્છાઓ પાઠવવામાં આવી હતી અને આગામી સમયમાં તાલુકાના વિકાસને વધુ ગતિ મળે તેવી આશા વ્યક્ત કરવામાં આવી હતી.
આ પ્રસંગે કપરાડાના ધારાસભ્ય જીતુભાઈ ચૌધરી, વલસાડ જિલ્લા ભાજપ મંત્રી નિલેશભાઈ ચોકસી, એપીએમસી ચેરમેન મુકેશભાઈ પટેલ, તાલુકા ભાજપ પ્રમુખ વિપુલભાઈ ભોયા, પૂર્વ પ્રમુખ રમેશભાઈ ગાંવીત, મનોજભાઈ પટેલ સહિત તાલુકા પંચાયતના સભ્યો અને ભાજપના હોદ્દેદારો મોટી સંખ્યામાં હાજર રહ્યા હતા. આગેવાનો દ્વારા ઉમેદવારોને શુભેચ્છાઓ પાઠવી તાલુકાના સર્વાંગી વિકાસ માટે સૌએ મળીને કાર્ય કરવાની અપીલ કરવામાં આવી હતી.
ઉમેદવારી પ સમગ્ર પ્રક્રિયા શાંતિપૂર્ણ રીતે પૂર્ણ થઈ શકે. કોઈ અનિચ્છનીય બનાવ વિના કાર્યવાહી પૂર્ણ થતા વહીવટી તંત્રએ પણ સંતોષ વ્યક્ત કર્યો હતો.
તાલુકા પંચાયતના નવા નેતૃત્વ અંગે હવે રાજકીય વર્તુળોમાં ચર્ચાઓ તેજ બની છે. સ્થાનિક સ્તરે વિકાસના વિવિધ મુદ્દાઓને ધ્યાનમાં રાખીને નવા નેતૃત્વ પાસેથી લોકોમાં અનેક અપેક્ષાઓ ઉભી થઈ રહી છે.
